Íþróttahelgi lokið á Fljótsdalshéraði

Líflegum íþróttadögum lauk á Fljótsdalshéraði síðastliðna helgi, en um helgina var bæði Íslandsmót utanhúss í bogfimi og Sumarhátíð UÍA. Að auki var keppt í knattspyrnu bæði á Vilhjálmsvelli og á Fellavelli. Allt saman fór þetta að sjálfsögðu fram í rjómablíðu.

Um 40 keppendur kepptu á Íslandsmótinu utanhúss í bogfimi og gekk mótið afar vel, en þetta er í fyrsta sinn sem mót af þessu tagi er haldið á Austurlandi. Er óskandi að við Austfirðingar sjáum meira af slíkum mótum í framtíðinni, enda öflugt starf unnið á Fljótsdalshéraði hjá bogfimideild Skaust.

Hægt er að lesa frétt og sjá úrslit mótsins á archery.is.

Sumarhátíð UÍA og Síldarvinnslunnar hófst á föstudegi með púttmóti og borðtenniskeppni. Á laugardegi voru fjallahjólreiðar í Selskógi og frábær dagskrá og keppni bæði í Tjarnargarði og Bjarnadal. Frjálsíþróttamótið hefðbundna fór svo fram á Vilhjálmsvelli á sunnudegi ásamt boccia, og var gaman að sjá bæði unga sem aldna taka þátt.

Þó svo að Sumarhátíðin hafi breyst í tímanna rás er hún órjúfanlegur hluti sumarsins fyrir marga Austfirðinga og flestir nú þegar farnir að hlakka til næstu hátíðar.

This entry was posted in Austurland, Fljótsdalshérað and tagged , , . Bookmark the permalink.

Comments are closed.